Rama: Mbrojtja e Samitit të NATO-s ku do të jetë edhe Trump, do të bëhet me dronë “Made in Albania”

Kryeministri Edi Rama deklaroi se Shqipëria po zhvillon kapacitete të reja në fushën e industrisë së mbrojtjes, duke përfshirë prodhimin vendas të dronëve inteligjentë dhe pajisjeve të avancuara ushtarake.

Gjatë fjalës së tij në ceremoninë e dorëzimit të mjeteve taktike të prodhuara nga “Timak Defence”, Rama u shpreh se pret që së shpejti të prezantohen edhe produkte të tjera të prodhuara në Shqipëri për nevojat e sigurisë dhe mbrojtjes.

“Unë mezi pres të fillojmë të tregojmë edhe disa gjëra të tjera që po fillojnë të prodhohen në Shqipëri, ku siç e kemi premtuar, mbrojtja e qiellit në Samitin e NATO-s, ku do të jetë edhe presidenti i SHBA-ve, do të bëhet me dronë superinteligjentë të prodhuar këtu në Shqipëri, ‘Made in Albania’”, deklaroi Rama.

Kryeministri tha se Shqipëria është gjithashtu në proces për t’u pajisur me sisteme më të avancuara të mbrojtjes kundërajrore.

“Ashtu sikundër tanimë jemi gati, kemi bërë edhe porosinë për mbrojtjen më të sofistikuar kundërajrore, të cilën do ta ketë shumë shpejt edhe Shqipëria”, u shpreh Rama.

Sipas tij, zhvillimi i industrisë së mbrojtjes synon që Shqipëria të ketë më shumë kapacitete të prodhuara në vend dhe të rrisë rolin e saj brenda standardeve të Aleancës së NATO-s.