Rama: Nuk ka arsye për mospajtim, bullgarët duhet të përfshihen në kushtetutën e Maqedonisë së Veriut
Kryeministri i Shqipërisë, Edi Rama, deklaroi se nuk ka më arsye për mospajtime mes Shkupit dhe Sofjes, pasi përfshirja e bullgarëve në Kushtetutën e Maqedonisë së Veriut buron nga marrëveshja mes dy vendeve.
Kryeministri i Shqipërisë, Edi Rama, ka deklaruar se bullgarët duhet të përfshihen në Kushtetutën e Maqedonisë së Veriut, siç njofton Alsat. Sipas tij, për këtë çështje nuk ka më arsye për mospajtime mes Shkupit dhe Sofjes.
Deklarata u bë në një intervistë për Televizionin Kombëtar Bullgar (BNT), ku Rama tha se përfshirja e pakicës bullgare në Kushtetutë buron nga marrëveshja mes dy vendeve, e arritur me ndërmjetësimin francez.
I pyetur nëse vazhdon të ketë mospajtime me udhëheqjen bullgare, Rama u përgjigj se rrethanat e para tre viteve kanë qenë ndryshe. “Mendoj se tani nuk ka arsye për mospajtim, sepse nevoja që pakica bullgare të përfshihet në Kushtetutën e Maqedonisë është plotësisht e qartë. Kjo doli nga marrëveshja mes dy vendeve”, deklaroi ai, siç njofton Alsat.
Ndryshimet kushtetuese, që parashikojnë përfshirjen e bullgarëve mes bashkësive të njohura në Kushtetutë, janë pjesë e kompromisit të vitit 2022 për zhbllokimin e procesit të integrimit evropian të Maqedonisë së Veriut.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.