Rama për vlerësimet negative në Google për Kalanë e Rozafës: Prokuroria të veprojë ndaj autorëve



Kryeministri Edi Rama ka reaguar lidhur me fushatën e vlerësimeve negative në platformën Google për Kalanë e Rozafës, duke e cilësuar atë një përpjekje që dëmton imazhin e turizmit shqiptar.

Në një reagim në rrjetet sociale, Rama kritikoi autorët e komenteve dhe vlerësimeve negative, duke pyetur nëse synimi i tyre është të dëmtojnë turizmin dhe të largojnë vizitorët e huaj.

“Po me Kalanë e Rozafës çfarë keni, o patriota, apo ta shkatërrojmë sa të mundemi turizmin, se duhet t’i përzëmë të huajt dhe të kthehemi tek koha kur hanim njëri-tjetrin ëëë? ”, shkroi Rama.

Kryeministri kërkoi ndërhyrjen e organeve të drejtësisë, duke u shprehur se pret që Prokuroria të veprojë sa më shpejt ndaj personave që po dëmtojnë interesin publik dhe po shantazhojnë qytetarët përmes këtyre veprimeve.

“Uroj që Prokuroria të veprojë një orë e më parë me këta dhunues të pronës publike e private dhe shantazhues të qytetarëve të këtij vendi”, theksoi Rama.

Reagimi i kryeministrit vjen pas publikimit të një numri të madh vlerësimesh dhe komentesh negative në faqen e Kalasë së Rozafës në platformën Google, si dhe faqeve të shumë bizneseve të cilat ndikojnë në imazhin e  destinacioneve turistike të vendit.