Rama urdhëron deputetët dhe ministrat: Intensifikoni komunikimin për integrimin në BE

Mbledhja me dyer të mbyllura e kryeministrit Edi Rama me deputetë dhe ministra në Pallatin e Brigadave përfundoi pas rreth katër orësh. Ai u kërkoi pjesëmarrësve të njohin në detaje procesin e integrimit në Bashkimin Europian dhe të dialogojnë drejtpërdrejt me qytetarët, duke vënë theksin te siguria ushqimore si sfida kryesore dhe nevoja për punë intensive në këtë fushë. Rama po ashtu nxitën kontaktet me fermerët dhe bizneset dhe kërkoi që puna e qeverisë të bëhet e dukshme përmes komunikimit publik.

Raporton TV Klan se në Grupin Parlamentar të Partisë Socialiste prezantuan raporte gjashtë drejtues politikë të qarqeve: Dibër, Berat, Fier, Elbasan dhe Durrës. Drejtuesi i qarkut të Tiranës u ndal më shumë te turi i nisur nga socialistët “Punët e Shqipërisë” dhe problematikat e hasura në terren gjatë takimeve me qytetarët. Gjithashtu u zhvillua një bllok i dytë raportimesh nga ministri për Evropën dhe Punët e Jashtme, Ferit Hoxha, dhe kryenegociatorja Majlinda Dhuka lidhur me ecurinë e negociatave për anëtarësim.

Kreu i qeverisë theksoi rëndësinë e bashkëpunimit të ngushtë brenda radhëve të socialistëve dhe prioritizimin e zgjidhjes së çështjeve konkrete që prekin jetën e përditshme të qytetarëve. Ai kërkoi gjithashtu që deputetët të jenë më aktivë në rrjetet sociale për të publikuar punët e realizuara në qytete dhe për të mbajtur lidhjen me komunitetet lokale.

Takimi i zgjeruar u zhvillua ndërsa qeveria ka dorëzuar në Kuvend raportin për ecurinë e procesit të anëtarësimit; Shqipëria pret miratimin e pikave ndërmjetme IBAR për të vijuar me mbylljen e kapitujve, sipas TV Klan.