Ramadani: Është gabim të besohet se Kurti ka vullnet të mirë, Aleanca ia lexoi lojën

Deputeti i Aleancës, Burim Ramadani, ka kritikuar ashpër takimet e liderëve të partive opozitare me kryeministrin Albin Kurti në kuadër të përpjekjeve për zgjedhjen e presidentit të ri të vendit, siç njofton Gazeta Express.

Sipas Ramadanit, këto takime nuk kanë pasur për qëllim arritjen e ndonjë marrëveshjeje politike. “Është gabim të besohet se Kurti ka vullnet të mirë. Takimet nuk kanë qenë asnjëherë për marrëveshje. Takimet kanë qenë për blerje kohe dhe për fotografi”, ka thënë Ramadani.

Në reagimin e tij, deputeti i Aleancës shkruan se në “lojën e Kurtit” kanë rënë fillimisht LDK-ja dhe më pas edhe PDK-ja, ndërsa Aleanca, sipas tij, “ia lexoi lojën” kryeministrit. “Në lojën e Kurtit kanë rënë fillimisht LDK, pastaj edhe PDK. Manovrim i tij. Manipulim i tij. Gabim kanë bërë të dyja. Aleanca qëndroi drejt! Aleanca mbeti e vetmja që e lexoi lojën e Kurtit. Që nga fillimi e deri në fund, Aleanca nuk u lëkund fare dhe e tha veç të vërtetën!”, thuhet në reagimin e publikuar sot nga Gazeta Express.

Kryeministri Kurti u takua ndaras me kryetarin e PDK-së, Bedri Hamza, dhe atë të LDK-së, Lumir Abdixhiku, në kërkim të një emri konsensual për president, përpara afatit të 6 tetorit të përcaktuar nga Gjykata Kushtetuese. Aleanca refuzoi takimin me Kurtin, ndërsa Ramush Haradinaj i kishte cilësuar më herët këto takime si manovra të kota.