Raporti i Komisionit Evropian: Mali i Zi përparim të mirë, por modeli ‘Euro’ rrezik i madh për financat publike

Mali i Zi ka arritur përparim të mirë në të gjitha kapitujt ku ende negocion me Bashkimin Evropian, thuhet në raportin vjetor të Komisionit Evropian për progresin e Malit të Zi, i cili prezantohet sot në Bruksel, siç njofton Televizioni Vijesti, që pati qasje në raport.

Përparim i mirë konstatohet edhe në kapitujt kyç 23 dhe 24. Detyrimi më i rëndësishëm i mbetur, që kërkon Brukseli, është përfundimi i miratimit të ndryshimeve kushtetuese, me të cilat hiqet imuniteti dhe futet provimi i integritetit për anëtarët e Qeverisë.

Komisioni kërkon përmirësim të rezultateve në hetime, ndjekje penale dhe dënime në lëndët e korrupsionit, veçanërisht atij të nivelit të lartë, sepse numri i aktgjykimeve të formës së prerë mbetet ende i vogël. Kërkohet edhe përmirësim urgjent i kapaciteteve dhe kushteve të punës në Prokurorinë Speciale të Shtetit, Departamentin Special të Policisë dhe Departamentin Special të Gjykatës së Lartë në Podgoricë.

Duke komentuar njoftimin e fundit të kryeministrit Milojko Spajiq për rritje të madhe të pagave nga janari, Komisioni thekson se modeli i sapo paralajmëruar “Euro” mund të përbëjë rrezik të konsiderueshëm për qëndrueshmërinë e financave publike dhe ekuilibrin e jashtëm dhe se kjo duhet vlerësuar më në detaje, pas konsultimeve me palët e interesuara.

Sipas Portalit ETV, Brukseli konstaton se deficiti buxhetor i Malit të Zi e tejkaloi vlerën e synuar për vitin e kaluar dhe se cenueshmëritë fiskale vazhdojnë për shkak të nivelit të lartë të shpenzimeve të detyrueshme dhe nevojave të mëdha për rifinancimin e borxhit. Komisioni sugjeron që Qeveria të kufizojë shpenzimet publike dhe shumën e përgjithshme për pagat në sektorin publik në afat të mesëm dhe të zbatojë masa për rritjen e të hyrave, për të siguruar respektimin e rregullave fiskale.