Rihapet Muzeu Etnografik në Durrës pas Rikonstruksionit

Muzeu Etnografik në Durrës është rihapur për publikun pas një rikonstruksioni të plotë, pas dëmeve të shkaktuara nga tërmeti i vitit 2019. Ky projekt ka rikthyer në funksion një nga institucionet kryesore kulturore të qytetit.

Drejtoresha e Qendrës Kulturore “Aleksandër Moisiu”, Alketa Tragaj, nënvizoi se muzeu është rinovuar në mënyrë të plotë, duke siguruar ambiente moderne për vizitorët dhe duke nxjerrë në pah vlerat historike dhe kulturore të koleksioneve të tij.

Një vëmendje e veçantë i është kushtuar ekspozimeve dedikuar aktorit të njohur shqiptar dhe ndërkombëtar Aleksandër Moisiu. Në katin e dytë kanë marrë vend kostume popullore nga Shqipëria e Mesme, si dhe objekte që pasqyrojnë traditat dhe jetën e përditshme të zonës gjatë kohëve të ndryshme.

Rikonstruksioni i godinës është realizuar në kuadër të projektit EU4Culture, një iniciativë e financuar nga Bashkimi Evropian me qëllim restaurimin dhe promovimin e trashëgimisë kulturore në Shqipëri.