Rihapja e Muzeut Etnografik në Durrës pas Rikonstruksionit

Muzeu Etnografik në Durrës ka rihapur dyert për vizitorët pas një rikonstruksioni të plotë, i cili u bë pas dëmeve të shkaktuara nga tërmeti i vitit 2019. Ky investim ka rikthyer në funksion një nga hapësirat më të rëndësishme të trashëgimisë kulturore të qytetit.

Drejtoresha e Qendrës Kulturore “Aleksandër Moisiu”, Alketa Tragaj, theksoi se muzeu është rijetëzuar plotësisht, duke ofruar kushte moderne për vizitorët dhe duke vënë më shumë në pah vlerat historike dhe kulturore. Një vëmendje e veçantë është kushtuar edhe ekspozitave që përkushtohen figurës së aktorit të madh shqiptar dhe ndërkombëtar, Aleksandër Moisiu.

Në katin e dytë të muzeut janë vendosur kostume popullore nga Shqipëria e Mesme, si dhe objekte që pasqyrojnë traditat dhe jetën e përditshme të zonës nëpër vite.

Rikonstruksioni i godinës është realizuar në kuadër të projektit EU4Culture, një iniciativë e mbështetur nga Bashkimi Evropian, që ka për qëllim restaurimin dhe promovimin e trashëgimisë kulturore në Shqipëri.