Rusia: Rrëzuam 371 dronë ukrainas gjatë natës, pesë persona u plagosën

Ministria e Mbrojtjes e Rusisë ka njoftuar se sistemet e mbrojtjes ajrore kanë interceptuar dhe shkatërruar 371 dronë ukrainas gjatë natës mbi rajone të ndryshme të vendit, si dhe mbi ujërat e Detit të Zi dhe Detit Azov.

Sipas autoriteteve ruse, sulmi ka shkaktuar dëme në rajonin jugor të Volgogradit, ku pesë persona mbetën të plagosur. Gjithashtu, një person tjetër u plagos në rajonin e Rostovit.

Ministria tha se sulmet shkaktuan një zjarr në një ndërmarrje industriale të sektorit të karburantit dhe energjisë në jug të Volgogradit, si dhe në një depo në lagjen Dzerzhinsky të qytetit. Shërbimet e emergjencës vijojnë punën për shuarjen e flakëve dhe menaxhimin e situatës.

Sipas njoftimit, dronët u rrëzuan mbi rajonet Belgorod, Bryansk, Voronezh, Volgograd, Kursk, Rostov, Tula dhe Krasnodar, si edhe mbi republikat e Dagestanit, Krimesë dhe Tatarstanit. Autoritetet ruse raportuan gjithashtu se mjete ajrore pa pilot u neutralizuan edhe mbi Detin Azov dhe Detin e Zi.

Pretendimet e Ministrisë së Mbrojtjes së Rusisë nuk janë konfirmuar në mënyrë të pavarur, ndërsa pala ukrainase nuk ka reaguar ende lidhur me njoftimin.