Rusia rrit ndihmën humanitare për Kubën duke dhënë 2 milionë dollarë

Rusia ka bërë të ditur se ka angazhuar gjithsej 18 milionë dollarë për nisma humanitare në Kubë gjatë periudhës 2018–2025 dhe planifikon të kontribuojë me 2 milionë dollarë shtesë gjatë vitit 2026.

Deklarata u bë nga ministri i Brendshëm rus, Vladimir Kolokoltsev, gjatë një takimi të Asamblesë së Përgjithshme të Kombeve të Bashkuara, ku ai kërkoi heqjen e embargove tregtare, ekonomike dhe financiare.

Sipas Kolokoltsev, fondet janë kanalizuar përmes Programit Botëror të Ushqimit, duke mbështetur projekte humanitare dhe nisma për forcimin e sigurisë ushqimore në Kubë.

Ai bëri të ditur gjithashtu se, nga viti 2021 deri në vitin 2025, Rusia financoi me 5 milionë dollarë një projekt të Programit Botëror të Ushqimit për zhvillimin e një sistemi të qëndrueshëm të ushqimit në shkollat kubaneze.

Ndërkohë, Ministria ruse e Emergjencave njoftoi se një dërgesë humanitare prej 211 tonësh vaj luledielli të pasuruar me vitamina A dhe D, e destinuar për qytetin Santiago de Cuba, është vonuar përkohësisht në Venezuelë, por mbetet pjesë e programit të vazhdueshëm të ndihmës së Moskës për popullin kubanez.