Samiti i NATO-s në Ankara, liderët e Aleancës bashkohen për foton familjare, Rama në rreshtin e parë me Erdogan, Rutte e Trump

Krerët e shteteve dhe qeverive të vendeve anëtare të NATO-s u mblodhën në Ankara në kuadër të samitit të Aleancës, ku zhvilluan edhe foton tradicionale familjare.

Në mesin e liderëve ishte edhe kryeministri shqiptar Edi Rama, i cili u pozicionua në rreshtin e parë, pranë Presidentit të Turqisë Recep Tayyip Erdoğan, Sekretarit të Përgjithshëm të NATO-s Mark Rutte dhe Presidentit të Shteteve të Bashkuara, Donald Trump.Samiti i Ankarasë ka bërë bashkë udhëheqësit e 32 vendeve anëtare të NATO-s, si dhe partnerë të rëndësishëm të Aleancës, për të diskutuar sfidat aktuale të sigurisë dhe prioritetet strategjike.

Në fokus të takimeve janë forcimi i kapaciteteve mbrojtëse, rritja e investimeve në mbrojtje, modernizimi ushtarak, koordinimi i politikave të sigurisë, si dhe mbështetja e vazhdueshme për Ukrainën. Gjithashtu, liderët po diskutojnë mbi rritjen e rolit të Europës në mbrojtjen kolektive dhe objektivat e reja të shpenzimeve ushtarake të vendeve anëtare.

Pjesëmarrja e kryeministrit Rama në samit riafirmon angazhimin e Shqipërisë si anëtare e NATO-s për të kontribuar në sigurinë kolektive dhe për të përballuar sfidat e përbashkëta të Aleancës.