Sharanoviq: Britania e Madhe, partner i besueshëm i Malit të Zi në fushën e sigurisë

Ministri i Punëve të Brendshme të Malit të Zi, Danilo Sharanoviq, deklaroi se Britania e Madhe është partner i rëndësishëm dhe i besueshëm i vendit të tij, veçanërisht në fushën e sigurisë.

Sharanoviq u takua, në margjinat e takimit ministror të Procesit të Berlinit kushtuar punëve të brendshme, me ministren britanike për Migracionin dhe Shtetësinë, Xho Uajt, njoftoi Ministria e Punëve të Brendshme. Mali i Zi këtë vit kryeson Procesin e Berlinit.

“Britania e Madhe është partner i rëndësishëm dhe i besueshëm i Malit të Zi, veçanërisht në fushën e sigurisë. Bashkëpunimi ynë është jashtëzakonisht i fortë dhe duam ta forcojmë më tej përmes shkëmbimit të përvojave dhe ekspertizës, si dhe veprimit të përbashkët përballë sfidave të sigurisë”, tha Sharanoviq.

Ministrja Uajt falënderoi Malin e Zi si nikoqir të Procesit të Berlinit këtë vit dhe theksoi se Britania e Madhe mbetet e përkushtuar ndaj bashkëpunimit me partnerët në të gjithë Ballkanin Perëndimor për zgjidhjen e sfidave të përbashkëta.

“Kriminelët që qëndrojnë pas krimit të organizuar dhe migracionit të paligjshëm veprojnë përtej kufijve shtetërorë. Prandaj është vendimtare që me partnerët tanë ndërkombëtarë, përfshirë partnerët në të gjithë Ballkanin Perëndimor, t’u përgjigjemi vendosmërisht këtyre sfidave. Së bashku do të forcojmë sigurinë e kufijve, do të shpërbëjmë rrjetet kriminale dhe do t’i bëjmë shtetet dhe komunitetet tona më të sigurta”, theksoi ajo.

Burimi: RTCG