Shkrimtari Daniel Kehlmann promovon romanin “Lojë dritash” në Gjirokastër

Shkrimtari i mirënjohur gjermano-austriak Daniel Kehlmann ka promovuar romanin e tij “Lojë dritash” në shtëpinë e lindjes së gjeniut të letërsisë shqipe Ismail Kadare, në qytetin e Gjirokastrës. Kehlmann është autor i dhjetëra veprave, ndërsa romani i tij më i njohur “Matja e botës”, i përkthyer në mbi njëzet gjuhë të botës, është libri më i shitur në gjuhën gjermane. Ai është fitues i disa çmimeve prestigjioze ndërkombëtare për letërsinë. Përgjatë bashkëbisedimeve me lexuesit, shkrimtari u shpreh se me Gjirokastrën është njohur përmes librave të Kadaresë, ndërsa qyteti i gurtë do të jetë subjekt në krijimtarinë e tij letrare.

“Ky qytet është shumë i bukur. Është i mrekullueshëm, si qytet përrallash, si qytet nga librat. Zor ta besoj që ndodhem këtu. Është një qytet i magjishëm i rrethuar nga malet, i denjë për të qenë një subjekt letrar më vete”, thotë shkrimtari Daniel Kehlmann.

Së bashku me përkthyesen Anna Kove, Kehlmann prezantoi vlerat dhe risitë e romanit “Lojë dritash”. Kjo vepër letrare kthen vëmendjen e lexuesit te jeta nën diktaturë.

“Jam shumë i lumtur që librin tim po e prezantoj sot në shqip. Romani quhet “Lojë dritash”. Është një histori e vërtetë e një regjizori që në kohën e nazizmit do të udhëtonte në Hollivud, u arratis atje dhe për arsye familjare u kthye sërish dhe bëri filma për nazistët. Kjo është një histori për lirinë dhe për mungesën e lirisë, për artin, diktaturën dhe unë shpresoj shumë që dhe lexuesi shqiptar me historinë e tij të gjejë veten”, thotë ai.

Krahas Gjirokastrës, shkrimtari Daniel Kehlmann ka zhvilluar një tur bashkëbisedimesh me lexuesit në disa qytete të vendit.

The post Shkrimtari Daniel Kehlmann promovon romanin “Lojë dritash” në Gjirokastër appeared first on Euronews Albania.