Shqipëria në “Adria Hotel Forum” Beograd, emra të njohur hotelesh nisin investimet

Paketa turistike shqiptare është paraqitur edhe në “Adria Hotel Forum”, një nga konferencat më të rëndësishme për hotelerinë, zhvilluar për të shtatin vit radhazi në Beograd, në datat 20-21 shkurt me përfaqësues të emrave të njohur të hotelerisë në rajon, ku përthithja e investimeve nga marka të njohura, por edhe realizimi i një pakete të përbashkët turistike në rajon ishin disa nga qëllimet e kësaj konference.

Ministri Klosi u shpreh qartë duke thënë: Një interes i jashtëzakonshëm i bizneseve të hotelerisë së gjithë vendeve të rajonit, është trguar së fundmi për Shqipërinë. Interes i madh sidomos, është shfaqur për zonat tradicionale të bukurive tona natyrore në Alpe dhe në Korçë.  

Vlerësim i veçantë i është bërë edhe paketave e lehtësirave fiskale, që Shqipëria ka promovuar në hotelerinë me 5 yje. Ne tashmë jemi në negocim me mbi 15 emra të njohur biznesesh, dhe kanë filluar tashmë edhe investimet e para në Shqipëri. Futja e emrave të njohur në biznesin e hotelerisë, do të bëjë të mundur që oferta të jetë e përbashkët edhe për tregun aziatik, nordik apo balltik, duke zgjeruar rrethin e investitorëve nga vendet e ndryshme të botës.”

Në konferencë nga folësit u vlerësua mjaft, paketa e lehtësirave fiskale që Shqipëria ka promovuar në hotelerinë me 5 yje.