Simfonia e 9-të e Beethoven-it përmbyll sezonin artistik

Me interpretimin e Simfonisë nr. 9 të Ludwig van Beethoven, Orkestra Simfonike e RTSH-së përmbylli sezonin artistik me një koncert të mbajtur në skenën e Teatrit Kombëtar të Operës dhe Baletit.

Në këtë mbrëmje festive interpretuan solistët Eva Golemi, Vikena Kamenica, Amadi Lagha dhe Artur Vera, ndërsa Korin e Teatrit Kombëtar të Operës dhe Baletit e drejtoi dirigjenti Dritan Lumshi.

Blerta Ristani, drejtoresha artistike e Orkestrës Simfonike të RTSH-së, vlerësoi punën e orkestrës gjatë sezonit, duke theksuar misionin e saj në promovimin e muzikës klasike dhe kulturës shqiptare.

“Kjo vepër përmban ‘Odën e Gëzimit’, himnin e Evropës, ndërsa lëvizja e katërt është një krijim monumental që kërkon një ansambël të madh artistik. Më gëzon fakti që kemi dhënë kontributin tonë në atmosferën pozitive që po përjeton Shqipëria në këtë periudhë të rëndësishme të negociatave,” u shpreh Ristani.

Edhe drejtori i përgjithshëm i TKOBAP, Aulon Naci, vuri në pah rëndësinë e bashkëpunimeve ndërinstitucionale, duke theksuar se produksione të tilla jo vetëm pasurojnë jetën kulturore të vendit, por edhe afronë publikun me muzikën klasike.

Kryevepra e Beethoven-it, e cila kulmon me “Odën e Gëzimit”, himnin e Bashkimit Evropian, përcolli një mesazh të fuqishëm uniteti, paqeje dhe solidariteti, duke shënuar një mbyllje dinjitoze të sezonit artistik të Orkestrës Simfonike të RTSH-së.