SIRI – Arrestohet një komandant i lartë i Shtetit Islamik

DAMASK, 18 gusht /ATSH-AFP/ – Autoritetet siriane njoftuan sot arrestimin e një komandanti të lartë të grupit Shteti Islamik (ISIS) në veri të vendit, gjatë operacionit të fundit kundër xhihadistëve.

Në një deklaratë, Ministria e Brendshme siriane tha se forcat e sigurisë dhe partnerë ndërkombëtarë të paidentifikuar kishin arrestuar Hamza Abdullah Mohammad, me nofkën Abu Jihad al-Muhajir, një zyrtar të lartë ushtarak të ISIS”, pranë Manbij, në provincën veriore të Alepos.

Ministria specifikoi se ai kishte shërbyer si komandant i përgjithshëm i grupit në rajonin e Damaskut dhe si ish-zëvendëskomandant ushtarak i organizatës. Ai më parë kishte qenë përgjegjës për provincën e Idlibit. “Ky operacion është pjesë e përpjekjeve të vazhdueshme të sigurisë për të gjurmuar qelizat dhe udhëheqësit e ISIS-it, për të çmontuar rrjetet e tij dhe për të parandaluar përpjekjet e tij për t’u riorganizuar dhe kërcënuar sigurinë e qytetarëve dhe stabilitetin e vendit”, vazhdoi ajo. Duke kontrolluar pjesë të mëdha të Sirisë dhe Irakut, ISIS pësoi një disfatë territoriale në Siri në vitet 2017 dhe 2019, por mbetjet e grupit mbeten, veçanërisht në shkretëtirën e madhe të vendit./