Tahiri: Visho Ajazi ushtar i Berishës! Turp që është ambasador në NATO

“Shqipëria ka qenë e mbushur me kanabis! Ju keni gënjyer, ose keni mbyllur sytë. Nuk flasim vetëm për Lazaratin, kështu ka qenë Kruja, Berati, Malësia e Madhe, Tirana po ashtu.Jam i hapur për ballafaqim shifrash me ty dhe këdo. Në katër vite që kam qenë unë ministër janë më pak se një vit i Sali Berishës”, deklaroi Tahiri.

Bushati iu referua edhe mediave ndërkombëtare dhe disa shkrime në to në lidhje me kultivimin e hashashit.

“Mediat italiane, gjermane e franceze kanë shkruar që në Shqipëri po bëhet nami me kultivimin e hashashit”, tha Bushati.

Tahiri e mohoi këtë.

“Në mediat e huaja e dimë të gjithë sesi blihen artikujt se janë artikuj me pagesë”, tha ai.

Sa u takon akuzave për ish-oficerin e Policisë, Dritan Zagani, Tahiri tha se po hetohet nga Prokuroria e Krimeve të Rënda në lidhje me deklaratat e tij.

Por ne emision doli në pah edhe emri i ish-kreut të Shërbimit Informativ Shtetëror, Visho Ajazi Lika.

Armand Shkullaku: Ti u shkarkove dhe menjëherë sapo ti u shkarkove, dolën në dritë raportet që provonin të gjithë atë që përflitej për trafikun e drogës.

Saimir Tahiri: Cilat raporte?

Armand Shkullaku: Raportin e Visho Ajazit.

Saimir Tahiri: Visho Ajazit, atij ushtarit të Berishës?!

Armand Shkullaku: Atij ushtarit të Berishës që sot është ambasadori juaj në NATO.

Saimir Tahiri: Turp që është ambasador në NATO.

Andi Bushati: Dallimi mes jush dhe Sali Berishës është që ai të vinte kriminelët dhe të vrisnin, ndërsa ju jeni vegël e kriminelëve. Nuk e di kush është më keq, njerëzit të gjykojnë. Unë e përbuz sistemin e Berishës, por ju jeni zarat e kriminelëve.

Visho Ajazi-Lika u dorëhoq papritur nga kreu i SHISH në fund të tetorit të vitit të kaluar. Pak ditë pas kësaj dorëheqjeje, ai u propozua për Ambasador në NATO nga Qeveria, propozim që u miratua nga Presidenti Meta.

Top Channel