Të ardhurat nga renta në dogana bien 60% për 5 mujorin

Renta minerale (taksa që kompanitë e naftës dhe të minerave paguajnë për shfrytëzimin e pasurive natuyrore të vendit) ka pasur performancën më negative në pesë muajt e parë të këtij viti. Sipas të dhënave nga statistikat e Ministrisë së Financave, të ardhurat nga ky zë, të mbledhura nga dogana ishin vetëm 1.4 miliardë lekë, nga 2.4 miliardë lekë të planifikuara, ndërkohë që shënuan një rënie prej 60%, apo dy miliardë lekë në raport me të njëjtën periudhë të vitit të kaluar.

Arsyet kryesore të rënies së këtij zëri në dogana lidhen me konjukturën e pafavorshme ndërkombëtare, me çmime të ulëta, sidomos ato të karburanteve dhe ndryshimin e konjukturës së prodhimit (Bankers Petroleum, që është dhe paguesi më i madh i rentës në vend, në pjesën e parë të këtij viti rreth 40% të prodhimit e ka shitur në tregun e brendshëm, duke mos e paguar rentën në dogana).

Ulja e të ardhurave nga TVSH në dogana me 2.9 miliardë lekë dhe rënia e të ardhurave nga renta me 2 miliardë lekë, janë arsyet kryesore që kanë ndikuar në performancën e dobët të doganave në pesë muajt e parë të vitit, me të ardhurat në total, që ranë me 3.6 miliardë lekë, apo 6.5%.

Edhe të ardhurat nga akciza në doganë, megjithëse janë 1.4 miliardë lekë më shumë se fakti i 5 mujorit 2014, janë 4.4 miliardë lekë më të ulëta sesa planifikimi i  financave në fillim të vitit, me optimizmin që vinte nga rritja e akcizës për disa produkte, si psh cigaret.