Irani arreston 39 persona për lidhje me Izraelin dhe SHBA-të

Ministria e Inteligjencës e Iranit njoftoi arrestimin e 39 personave të cilët konsiderohen “anëtarë të grupeve terroriste dhe mercenarë armiqësorë sionisto-amerikanë” në Teheran.

“Njëzet e shtatë prej këtyre mercenarëve ishin anëtarë të dy grupeve separatiste dhe synonin të krijonin një celulë operative në provincën Sistan dhe Baluchistan,” në juglindje të vendit, “për të nxitur pasiguri, por u arrestuan para se të mund të vepronin,” njoftoi ministria, sipas agjencisë iraniane Fars.

Gjatë operacioneve u sekuestruan gjithashtu “49 eksplozivë të improvizuar, 2 pushkë sulmuese Kalashnikov, 16 pistoleta, 50 karikatorë dhe mbi 1500 fishekë, së bashku me 7 pajisje Starlink”, kompania për akses interneti satelitor e Elon Musk.

Ndër të tjerët e arrestuar, disa “kishin detyrë të destabilizonin ambientin psikologjik të shoqërisë në hapësirën kibernetike”, ndërsa të tjerët dyshohen për dërgimin te “armiqtë” të pozicioneve të disa anëtarëve të forcave të sigurisë dhe ushtarëve.

Që nga fillimi i konflikteve me Shtetet e Bashkuara dhe Izraelin, Teherani ka njoftuar arrestimin e qindra personave të akuzuar si “mercenarë” ose “agjentë” që punojnë për Izraelin ose për SHBA-të.   /os/