TEL AVIV – Izraeli paralajmëroi SHBA-në për një komplot të dyshuar iranian për të vrarë Trumpin

UASHINGTON, 10 korrik /ATSH-DPA/ – Izraeli ka paralajmëruar qeverinë amerikane për një komplot të dyshuar iranian për të vrarë Presidentin Donald Trump, raportuan CNN dhe ”Wall Street Journal”, duke cituar burime të paidentifikuara.

Sipas raportimeve, udhëheqja e Iranit e kishte hartuar planin vetëm kohët e fundit.

Detajet e komplotit të dyshuar nuk ishin menjëherë të disponueshme.

”Administrata amerikane ka marrë paralajmërime të ngjashme shpesh në javët e fundit”, raportoi CNN, duke cituar një zyrtar amerikan.

”Megjithatë, paralajmërimi nga Izraeli ishte i ri dhe përfshinte një plan specifik vrasjeje”, tha zyrtari.

Një tjetër zyrtar amerikan i tha CNN se paralajmërimi mund të ketë qenë gjithashtu një përpjekje për të ndikuar në vendimet e Trumpit për luftën me Iranin.

Kryeministri izraelit Benjamin Netanyahu kohët e fundit ka kërkuar një qëndrim më të ashpër ndaj Teheranit dhe është përplasur me Trumpin për këtë çështje.

Trump nxiti spekulimet rreth shqetësimeve për sigurinë pasi nuk e përdori avionin ”Air Force One” të ri siç pritej në fluturimin e tij të kthimit nga samiti i NATO-s në Ankara.

“Unë jam numri një në listën e vrasjeve për Iranin”, tha ai, pa dhënë hollësi./ a.jor.