Trump: Do të shqyrtoj kërkesën e familjeve të viktimave për publikimin e dokumenteve të 11 shtatorit

Presidenti i Shteteve të Bashkuara, Donald Trump, deklaroi të dielën se do të marrë në shqyrtim kërkesën e familjeve të viktimave të sulmeve terroriste të 11 shtatorit 2001 për publikimin e më shumë dokumenteve zyrtare lidhur me ngjarjen.

Duke folur me gazetarët në Irlandë, pak para se të hipte në avion për t’u kthyer në Shtetet e Bashkuara, Trump u shpreh: „Do ta shqyrtoj kur të kthehem“.

Deklarata e tij vjen në fundjavën e 25-vjetorit të sulmeve. Të premten, familjet e viktimave u mblodhën në Ground Zero, pranë Memorialit Kombëtar të 11 Shtatorit në Nju Jork, ku i kërkuan presidentit të publikojë dokumente të pacensuruara, sidomos materiale që lidhen me lidhjet e mundshme mes zyrtarëve sauditë dhe rrëmbyesve të avionëve.

Fokusi i kërkesës së tyre është te figura si Omar al-Bayoumi, një shtetas saudit që ndihmoi dy nga rrëmbyesit të vendoseshin në Kaliforni, dhe Fahad al-Thumairy, një diplomat dhe imam saudit. Komisioni i 11 Shtatorit dokumentoi këto kontakte, por nuk gjeti prova se qeveria saudite kishte financuar al-Qaedën, ndërsa Arabia Saudite ka mohuar vazhdimisht përfshirjen.

Vlen të theksohet se më 11 shtator, disa dokumente të shumëkërkuara u deklasifikuan dhe u bënë publike për herë të parë – përfshirë një përmbledhje të brifingjeve ditore të presidentit që përmendnin al-Qaedën, të përpiluara nga Komisioni i 11 Shtatorit – ndërsa familjet thonë se pjesa më e madhe e materialeve mbetet ende sekrete.

Burimi: Reuters