UASHINGTON – Rubio: SHBA-ja dhe Kina duhet të bashkëpunojnë, jo të përshkallëzojnë tensionet

UASHINGTON, 22 korrik /ATSH-DPA/- Sekretari amerikan i Shtetit, Marco Rubio, deklaroi sot se pavarësisht tensioneve mes Uashingtonit dhe Pekinit, ekziston hapësirë për bashkëpunim, ndërsa shprehu besimin se mund të arrihet progres konkret, përpara vizitës së pritshme të presidentit kinez, Xi Jinping, në Shtetet e Bashkuara të Amerikës në shtator.

Gjatë një takimi me gazetarët përpara takimit të ministrave të Jashtëm të ASEAN-it në Manila, Rubio tha se do të ishte “e papërgjegjshme” që SHBA-ja dhe Kina të mos mbanin marrëdhënie, duke pasur parasysh ndikimin që të dyja vendet kanë në ekonominë globale.

Ai paralajmëroi gjithashtu se një konflikt mes dy fuqive do të kishte “pasoja katastrofike”.

Rubio bëri të ditur se me ministrin e Jashtëm kinez, Wang Yi, është diskutuar edhe një propozim amerikan, për krijimin e mekanizmave të përhershme të bashkëpunimit në fushën e tregtisë dhe investimeve.

Sipas tij, zbatimi i kësaj nisme mund të nisë përpara vizitës së Xi Jinping në Uashington.

Nga ana e tij, Wang Yi e cilësoi vitin 2026 si një vit të rëndësishëm për marrëdhëniet Kinë-SHBA dhe kërkoi që të dyja palët të zbatojnë marrëveshjet e arritura nga udhëheqësit e tyre.

Ai kritikoi gjithashtu disa deklarata dhe veprime të fundit të SHBA-së, duke i kërkuar Uashingtonit të respektojë interesat thelbësore të Kinës.

Takimi u zhvillua në një kohë kur marrëdhëniet mes dy vendeve mbeten të tensionuara, ndërsa vazhdojnë edhe mosmarrëveshjet në Detin e Kinës Jugore, ku SHBA-ja mbështet aleatin e saj, Filipinet, përballë pretendimeve territoriale të Pekinit./