UASHINGTON – Trump: Lufta e SHBA-së kundër Iranit e ka shpëtuar BM-në nga kërcënimi bërthamor

LONDËR, 3 shtator /ATSH-DPA/ Presidenti amerikan, Donald Trump ka deklaruar se lufta e SHBA-së kundër Iranit e ka mbrojtur Britaninë e Madhe nga një sulm i mundshëm bërthamor, duke kritikuar sërish Londrën për mosangazhimin në konflikt.

Në një intervistë për “GB News”, Trump tha se nëse Irani do të kishte një armë bërthamore, do të kishte më shumë gjasa ta përdorte atë kundër Evropës, pasi Irani ka aftësi raketore për të goditur objektiva evropiane.

Trump kritikoi gjithashtu Britaninë e Madhe për qëndrimin ndaj konfliktit dhe tha se Londra merr një pjesë të konsiderueshme të naftës përmes Ngushticës së Hormuzit, ndërkohë që nuk e ka mbështetur SHBA-në në konflikt.

Presidenti amerikan përsëriti edhe kritikat ndaj emigracionit në Britani të Madhe dhe ndaj kryebashkiakut të Londrës, Sadiq Khan.

Ai pretendoi se në disa zona të Londrës, policia ka frikë të hyjë dhe se rendi publik është dobësuar.

Një burim pranë Khan i hodhi poshtë deklaratat, duke theksuar se kriminaliteti në Londër është në rënie dhe se qyteti është një qendër e madhe, shumëkulturore dhe në zhvillim.

Konflikti SHBA-Izrael-Iran ka shkaktuar ndërprerje në qarkullimin përmes Ngushticës së Hormuzit, një prej rrugëve më të rëndësishme të transportit të naftës dhe gazit në botë, duke sjellë rritje të çmimeve të karburanteve dhe tronditje në ekonomitë globale. /