Usain Bolt: Atletit australian Gout Gout i nevojitet mbështetje e fortë

Sprintieri legjendar sugjeron fokus dhe shmangie nga shpërqendrimet për të arritur suksese në pistë.

Usain Bolt, legjenda e atletikës, ka theksuar rëndësinë e një rrjeti mbështetës të fuqishëm për Gout Gout, atletin e ri australian që është duke tërhequr vëmendje me sukseset e tij. Bolt këshillon që Gout të qëndrojë i përqendruar në karrierë dhe të shmangë shpërqendrimet që vijnë me suksesin në sportin e atletikës.

Gout, i cili tashmë është krahasuar me sprinterin e madh nga Xhamajka, ka vetëm 18 vjeç dhe besimi tek aftësitë e tij është rritur sidomos pasi fitoi medaljen e artë në kategorinë për të rinj në Kampionatin e Atletikës në Australi këtë muaj. Ai ka fituar 200 metra me kohën mbresëlënëse 19.67 sekonda dhe 100 metra në 10.21 sekonda.

Usain Bolt, i cili mban ende rekordet botërore në 200 metra (19.19 sekonda) dhe 100 metra (9.58 sekonda), për CNN ka theksuar se në moshë të re atletët shpesh shpërqendrohen nga sukseset dhe fama. “Shpresoj që Gout të ketë njerëzit e duhur që ta drejtojnë dhe ta mbajnë të përqendruar në pistën e atletikës, sepse nëse dështon në këtë pikë, gjithçka mund të humbasë,” u shpreh Bolt.

Gout, djali i emigrantëve nga Sudani i Jugut, pritet të debutojë në Ligën e Diamantit në Oslo më 10 qershor, ku do të garojë në një fushë të fortë që kryesohet nga kampioni aktual olimpik, Letsile Tebogo nga Botsvana. Pavarësisht përparimit të tij të shpejtë, ishte vetëm në dhjetor 2024 kur bota njohu talentin e tij të veçantë, pasi theu rekordin kombëtar të Peter Norman me kohën e tij 20.04 sekonda në Kampionatet e Atletikës për Shkolla të Australisë.