Vlahovic frenon rinovimin me Juventusin, serbi pret ofertat nga dy gjigantë europianë

Dusan Vlahovic po vazhdon të hezitojë për të ardhmen e tij. Kontrata me Juventusin i skadon pas pak më shumë se 50 ditësh dhe ende nuk dihet se çfarë do të ndodhë me sulmuesin serb. Rinovimi ka pasur luhatje të mëdha. Pas janarit palët dukeshin më afër, por bisedimet nuk kanë përparuar. Juventusi i ka ofruar kontratë prej 6 milionë euro në vit, rreth gjysmën e pagës që merr aktualisht Vlahovic. Pas një hapjeje fillestare, tani mes palëve ka ftohje të qartë.

Sipas raportimeve, “sirena” nga Bayern Munich dhe Barcelona po ndikojnë në vendimin e tij. Barcelona mund të kërkojë zëvendësues për Lewandowski, ndërsa Bayerni synon një alternativë të Harry Kane. Ideja për t’u bashkuar me një nga këto dy klube e josh shumë sulmuesin. Babai i tij, njëkohësisht agjent, beson se si lojtar i lirë mund të sigurojë kontratë më të mirë në një klub të madh.

Juventusi nuk do të presë gjatë, pasi po planifikon ndryshime të mëdha në sulm. Për momentin, largimi i Vlahovic në fund të sezonit duket gjithnjë e më i mundshëm, edhe pse ai mbetet ende titullar i rëndësishëm në garën për Champions League.