Votat nga Tirana, Crawford voton Trumpin

Dhoma Amerikane e Tregtisë për të tretat zgjedhje me radhë, zhvilloi në Tiranë “Mbrëmjen zgjedhore” ku dhjetëra figura të njohura të biznesit dhe jo vetëm ndoqën procesin zgjedhor në Shtetet e Bashkuara. I pranishëm, ambasadori Donald Lu, theksoi rëndësinë e këtij procesi dhe forcën e qytetarëve, madje duke përmendur dhe zgjedhjet e ardhshme në Shqipëri.
Një votë për Donald Trump është siguruar nga presidenti i Dhomës Amerikane të Tregtisë, Mark Crawford, i cili nuk ngurron të tregoi arsyet se pse ka votuar për kandidatin republikan.
“Unë votova për Trump dhe ka lidhje me taksat. Ne amerikanët jemi tatuar sipas pasaportës, ndërsa të huajt sipas rezidencës. Por, para 6 vitesh ka hyrë një ligj që detyron të gjitha bankat për të spiunuar amerikanët. Disa banka kanë përjashtuar amerikanët që janë jashtë SHBA-ve dhe nuk mund të kenë një llogari kursimi, nuk mund të marrin një fond investimesh apo hua për shtëpi. Luftëra? Nuk frikësohem por besoj se nuk kemi për çfarë të luftojmë. Gjatë administratës Bush dhe atë të Obamës kemi hyrë në disa luftëra që tani duket sikur nuk ka shumë sens”, deklaroi Crawford.
Crawford e pranon se shqiptarët kanë një tërheqje ndaj familjes Clinton, por ka dhe një mesazh për këtë qasje.
“E kuptoj që në kulturën shqiptare jeni shumë besnik. Nëse dikush ju ka bërë nder, atëherë respektoni bashkëshorten, fëmijët, kushërinjtë etj, por në Amerikë nëse Bill Clinton ka bërë mirë nuk do të thotë se kështu do të bëjë edhe Hillary”, vijoi kreu i Dhomës Amerikane te Tregtisë
Gjatë kësaj mbrëmje të pranishmit zhvilluan një votim, ku në përfundim, fituese rezultoi Hillary Clinton me 65 për qind të votave.