Zhdukja e 700 mijë eurove të pensioneve e ndihmave ekonomike, Apeli lë në burg ish-drejtoreshën e Postës Durrës!

Nuk ka liri për ish-drejtoreshën e Postës së Durrësit, që dyshohet për zhdukjen e një shume prej 700 mijë eurosh që ishin të destinuara për pensionet dhe ndihmat ekonomike.

Gjykata e Apelit të Juridiksionit të Përgjithshëm Tiranë la sot (12 gusht) në fuqi masën e sigurisë “arrest me burg” për Elisabeta Matajn, ish-drejtoreshën e Postës së Durrësit.

Mataj akuzohet për përvetësimin e rreth 700 milionë lekëve. Ndërkohë, për dy ish-vartëset e saj, Paola Danaj dhe Valbona Duni, është lënë në fuqi masa “arrest në shtëpi”, që kishte dhënë më herët Gjykata e Durrësit.

Vendimi i Apelit konfirmon masat e sigurisë të vendosura ndaj tre të pandehurave, ndërsa hetimet për rastin vijojnë.

Ish-drejtoresha nuk e ka pranuar akuzën, ashtu sikurse dy vartëset e tjera. Disa filmime shfaqën punonjëset dhe ish-drejtoreshën me çanta me lekë, por asnjë prej tyre nuk pranon akuzat.