Zjarr i madh në një auto-otpad në Tetovë: digjen goma, akumulatorë dhe pjesë makinash — shpërthime dhe tym i dendur

Një zjarr i përmasave të mëdha shpërtheu sot në një auto-otpad në Tetovë, ku u përfshinë nga flakët goma, akumulatorë dhe pjesë plastike të automjeteve. Kolona e tymit të dendur u pa nga larg, ndërsa shpërthimet e herëpashershme shqetësuan banorët e zonës.

Zjarrfikësit u përballën me flakët për orë të tëra, duke luftuar për të vënë nën kontroll situatën. Në shuarjen e zjarrit dhe në mbrojtjen e objekteve përreth u përfshinë edhe banorë të zonës, të cilët ndihmuan ekipet e emergjencës.

Shefi i Njësisë së Mbrojtjes dhe Shpëtimit në Tetovë, Avni Ameti, deklaroi për TV21 se benzina pranë vendit të zjarrit është siguruar dhe për momentin nuk paraqet rrezik. Ai shpjegoi se shpërthimet që dëgjohen vijnë nga akumulatorët e ndryshëm që po digjen në otpad.

Në vendngjarje ka dalë edhe Inspektorati Komunal për Mjedisin, i cili po kryen analiza për të përcaktuar nëse zjarri ka shkaktuar ndotje të ambientit. Shefi i inspektoratit, Armend Salihi, paralajmëroi masa kundër pronarëve nëse konstatohen shkelje të ligjit.

Për shkak të gomave dhe materialeve të tjera që digjen, si dhe tymit të dendur mbi Tetovë, inspektorati dhe zjarrfikësit u rekomandojnë banorëve të zonës që t’i mbajnë dritaret mbyllura derisa të pastrohet ndotja.

Burimi: Denesen.mk