Zjarri në Fier, Çako: Situata vijon të jetë e rrezikshme, në gatishmëri kapacitetet për evakuim (VIDEO)

Situata e zjarrit në zonën e Levanit në Fier vijon të mbetet problematike, ndërsa në terren janë angazhuar të gjitha strukturat për përballimin e flakëve.

Drejtori i Përgjithshëm i Agjencisë Kombëtare të Mbrojtjes Civile, Haki Çako, tha se operacioni po zhvillohet si nga toka, ashtu edhe nga ajri, me mbështetjen e helikopterëve.

Sipas Çakos, era e fortë dhe temperaturat e larta kanë favorizuar përhapjen e flakëve dhe kanë bërë që zjarri të marrë përmasa të mëdha.

“Janë angazhuar të gjitha forcat dhe strukturat, nga toka dhe nga ajri, të gjitha njësitë vendore, të suportuara dhe të mbështetura edhe nga forcat nga ajri me helikopter. Jemi duke punuar për të vendosur përfundimisht në kontroll zjarrin.”

Çako theksoi se prioritet mbetet mbrojtja e banorëve dhe zonave të banuara, ndërsa kapacitetet për evakuim janë në gatishmëri.

Zjarri është afruar edhe pranë disa bizneseve, të cilat, sipas tij, fatmirësisht janë shpëtuar dhe nuk janë shkrumbuar nga flakët.

Megjithatë, situata vijon të konsiderohet e rrezikshme dhe autoritetet u bëjnë thirrje qytetarëve të tregohen maksimalisht të kujdesshëm, veçanërisht për shkak të temperaturave të larta dhe kushteve të favorshme për përhapjen e zjarreve.

Forcat në terren vijojnë punën për vendosjen përfundimtare të zjarrit nën kontroll.