Zjarri nga Puka përhapet në Mirditë, aktive dy vatra në Kaçinar dhe Përlat

Zjarri që ka përfshirë territorin e Pukës është përhapur edhe në territorin e Bashkisë Mirditë, duke aktivizuar një vatër zjarri në lagjen Molaj, në fshatin Shtuf, në Njësinë Administrative Kaçinar.

Sipas informacionit zyrtar, flakët kanë ardhur nga Mali i Tërbunit, në Pukë, dhe vijojnë të jenë aktive. Për shuarjen e zjarrit po punojnë katër efektivë zjarrfikës me një automjet, ndërsa ndërhyrja po kryhet edhe me mjete personale.

Një tjetër vatër vijon të jetë aktive pranë Shpellës së Valit, në fshatin Përlat i Epërm, si vazhdim i zjarrit të Lufajve. Sipas autoriteteve, zjarri paraqitet me intensitet të ulët.

Në këtë zonë po punojnë një automjet zjarrfikës me katër efektivë, si dhe tetë punonjës të shërbimit pyjor. Ndërhyrja për shuarjen e flakëve po kryhet gjithashtu me mjete personale.

Në të dyja vatrat nuk raportohet rrezik për banesat. Ndërkohë, autoritetet janë në pritje të informacionit përmbledhës për situatën në Rrajë të Velës, në Njësinë Administrative Rubik, ku zjarri u shua mbrëmjen e së mërkurës.