Zvërneci, Berisha: Nuk mbështes projekte që nuk përputhen me ligjin

Kryedemokrati Sali Berisha tha se projekti i Zvërnecit nuk është në përputhje me ligjin. Në një intervistë për emisionin “Off the Record” me Andrea Dangllin në A2CNN, Berisha theksoi se ai nuk mbështet asnjë projekt i cili nuk përputhet me ligjin.

Referuar projektit të Zvërnecit, kreu i selisë blu tha se është dhënë një leje zhvillimi dhe ndërtimi, por mandej leja e ndërtimit është anuluar me noter nga pronari. Kreu i PD ka akuzuar kryeministrin Edi Rama se ka vepruar sikur të bëhej fjalë për kopshtin e tij privat.

“Unë nuk mbështes asnjë projekt që nuk përputhet me ligjin. Në rastin e Zvërencit absolutisht s’është në përputhje me ligjin. Marr vesh unë pronën, shkon e i thotë pronari…Unë jam ish-kryeministër dhe s’mund të lëviz me emocione, unë gjykoj mbi bazë ligji. Thotë pronari: Pyete pak Ardit Bidon e kujt është toka. Ai kot nuk e tha. Ia tha Ramës. E ke në dialog me Ramën, se ky shkoi fshehtas aty dhe u taku. Ai i tha z.kryeministër pyet Ardit Bidon e kujt është toka. S’mund të bësh investim ti aty ku ka proces gjyqësor. Unë shoh që ky nuk kishte zbatuar asnjë ligj”, tha Berisha.

“Cilat janë ligjet? Ligji është ky: Në peizazh natyror të mbrojtur ligji kombëtar dhe ndërkombëtar përcakton, mund të mos investosh dot, por edhe mund të investosh. Nëse vendos të investosh do zbatosh 4 kushte europiane. Ky s’ka zbatuar asnjë ligj, por njësoj sikur të ishte në kopshtin e tij. Ky ka dhënë leje zhvillimi dhe leje ndërtimi, që ta dinë shqiptarët. Ka leje ndërtimi. Jo vetëm ka dhënë leje ndërtimi, por atë leje ndërtimi e ka anuluar me noter. Ka dhënë leje pa plotësuar asnjë kusht. E kam bërë publike pikë për pikë. Si e fsheh ti?! Ka dhënë në janar leje ndërtimi, dhe jo një, por dy leje. Ka kërkuar ndërtuesi t’i anulojë me noter. Projekti ka shkelur ligjin kombëtar dhe ndërkombëtar”, vijoi ai.