Agjenti i Di Gregorios: Do ta nisë grumbullimin me Juventusin, por e kërkojnë disa klube europiane

Agjenti i Michele Di Gregorios ka folur për të ardhmen e portierit të Juventusit, pas shpërthimit të tij në rrjetet sociale kundër drejtuesve të klubit bardhezi. Carlo Alberto Belloni konfirmoi se “gardiani” ka edhe tri vite kontratë me bardhezinjtë, por nuk përjashtoi transferimin kësaj vere:

“Di Gregorio ka edhe 3 vite kontratë me Juventusin. Ai do ta nisë grumbullimin me ekipin dhe gjatë merkatos do të vlerësojmë çdo mundësi. Është në listën e ngushtë të disa klubeve europiane, nuk kemi nxitim”.

Belloni mbrojti gjithashtu portierin nga kritikat e tifozëve, duke sulmuar drejtuesit e klubit: “Në dy sezone kanë ardhur 20 lojtarë të rinj, janë ndërruar 3 trajnerë dhe 3 drejtime. Këto janë numrat që bëjnë diferencën.

Di Gregorio e mbylli sezonin i katërti në renditjen e ‘Sofascore’, përpara Vanja Milinković-Savić dhe Yann Sommer. Juventusi pësoi 34 gola, ndërsa Interi 35, por shënoi vetëm 61 gola kundrejt 82 golave të Interit. Për të mbuluar shpenzimet e mëdha, fajin e sezonit ia hodhën portierit. Ne kërkojmë vetëm respekt për një lojtar që ka qenë gjithmonë në dispozicion të skuadrës”.