Aksident në tunelin e Llogarasë, plagoset lehtë një shofer dhe bllokohet qarkullimi

Më 23 prill, dy automjete u përplasën brenda tunelit të Llogarasë, duke shkaktuar bllokim të përkohshëm të qarkullimit rrugor në këtë segment.

Si pasojë e aksidentit, i cili sipas dyshimeve është shkaktuar nga një parakalim i gabuar, një prej drejtuesve të automjeteve pësoi lëndime të lehta dhe u transportua drejt spitalit të Vlorës. Sipas njoftimeve, gjendja e tij është jashtë rrezikut për jetën.

Në vendin e ngjarjes mbërriti Policia Rrugore, e cila po menaxhon situatën dhe po kryen ekspertizën për të zbardhur plotësisht rrethanat e aksidentit dhe për të rikthyer qarkullimin në normalitet.