Akuza për spiunazh për Kinën, arrestohet çifti gjerman në Mynih

Një çift i martuar është arrestuar në Mynih nën dyshimet për spiunazh për Kinën. Çifti gjerman dyshohet se kanë krijuar kontakte me shkencëtarë të shumtë në universitete dhe institute kërkimore gjermane në një përpjekje për të marrë informacion shkencor mbi teknologjinë e lartë që mund të ketë zbatime ushtarake.

Sipas prokurorëve, të dyshuarit kishin në shënjestër profesorë në fushat e inxhinierisë hapësinore, shkencës kompjuterike dhe inteligjencës artificiale.

Kur iu afroheshin akademikëve, dy të dyshuarit nganjëherë paraqiteshin si përkthyes dhe nganjëherë si punonjës të një kompanie automobilash.“Disa shkencëtarë u joshën me pretekstin e dhënies së leksioneve të paguara në Kinë për një audiencë politike”, thanë prokurorët. “Në realitet, këto leksione u ndanë më pas me anëtarë të kompanive shtetërore të mbrojtjes.”Të dy të dyshuarit do të paraqiten më vonë sot para një gjykate federale gjermane, e cila do të vendosë nëse do t’i lërë ata në paraburgim. Prokurorët thanë se operacionet policore në lidhje me rastin u kryen njëkohësisht në shtetet e Baden-Wurttemberg, Bavarisë, Berlinit, Brandenburgut, Saksonisë së Poshtme dhe North Rhine-Westphalia.

Megjithatë, këto operacione kishin për qëllim afrimin e dëshmitarëve dhe jo ndjekjen e të dyshuarve të tjerë. Në Mynih, u kontrolluan shtëpitë private dhe vendet e punës të dy të arrestuarve.