Amerikani David Schwendiman emërohet Prokurori Special i Gjykatës Speciale

Emërimi i Schwendiman, në pozitën e prokurorit, nënkupton që edhe Taskë Forca e deritashme shndërrohet në Zyrë të Prokurorit. Kjo i bie që amerikani do të jetë përgjegjës për të ndjekur krerët e UÇK’së, të cilët dyshohen për krime lufte, në bazë të pohimeve në raportin e Dick Martyt.

“Më 1 shtator 2016, David Schwendiman, Kryeprokuror i Taskë Forcës Speciale Hetuese të BE’së (SITF), është emëruar Prokuror Special (kryeprokuror) i Zyrës së Prokurorit Special të Kosovës” thuhet në njoftim.

“Zoti Schwendiman është emëruar në pajtim me nenin 35 të Ligjit të Kosovës për Dhomat e Specializuara dhe Zyrën e Specializuar të Prokurorit që është miratuar në gusht të vitit 2015. Emërimi i tij shënon edhe tranzicionion formal nga SITF në SPO” bën të ditur zyra e Prokurorit.

Schwendiman ka paralajmëruar një vizitë në rajon dhe një takim me media në një kohë të përshtatshme në javët dhe muajt e ardhshëm. Gjykata Speciale pritet të funksionalizohet plotësht pasi të miratohet në parlamentin holandez.

Pala kosovare e ka kryer punën e saj, pasi ish -Presidentja e Kosovës Atifete Jahjaga, ratifikoi marrëveshjen ndërkombëtare me shtetin e Holandës “Mbi organizimin e institucionit të Gjykatës Speciale të Kosovës i zhvendosur në Holandë”, të nënshkruar me 15 shkurt 2016 nga Ministri i Punëve të Jashtme të Kosovës dhe Ambasadorja e Holandës në Kosovë.