Aplikimet për subvencionet në bujqësi, sot afati i fundit për fermerët

Sot është dita e fundit e afatit të rishikuar për aplikimet e fermerëve për përfitim të subvencioneve direkte nëpërmjet skemës kombëtare të bujqësisë.

Ministria e Bujqësisë ka sqaruar se aplikimet sot do të jenë të hapura deri në orën 16:30 për 9 masa të mbështetjes direkte dhe 3 masa investimi, të dedikuara për zhvillimin e bujqësisë dhe blegtorisë.

Mbështetja përfshin blegtorinë, bletarinë, dosat dhe para dosat, fermat organike, sipërfaqet e mbjella, certifikimin Global G.A.P., kontrollin biologjik në sera, ripopullimin në ujërat e brendshme, si dhe investime për fermerët e rinj, ndërtimin e stanëve dhe mekanizimin e proceseve të punës.

Masat direkte aplikohen përmes e-Albania, ndërsa për masat e investimeve dosja dorëzohet fizikisht pranë zyrave qendrore të AZHBR-së.

Afati i aplikimeve për subvencionet e fermerëve në kuadër të Skemës Kombëtare të Bujqësisë është shtyrë me 10 ditë. Nga 26 qershori që ishte afati i fundit për aplikime, afati i ri do të jetë deri më 6 Korrik.

Ministri i Bujqësisë Andis Salla tha më herët se vendimi për shtyrjen e afatit është marrë për shkak të numrit të lartë të aplikimeve të regjistruara gjatë ditëve të fundit.

Ministri Salla: Shtyhet me 10 ditë afati i aplikimeve për subvencionet e fermerëve