Banka Botërore miraton 600 milionë dollarë për sektorin e gazit në Serbi — faza e parë nis me gazsjellësin Trupale–Pojate

Bordi ekzekutiv i drejtorëve të Bankës Botërore miratoi sot 600 milionë dollarë për Programin e Zhvillimit të Sektorit të Gazit në Serbi. Programi synon përmirësimin e sigurisë, besueshmërisë dhe qëndrueshmërisë së furnizimit me energji përmes investimeve në infrastrukturën strategjike të gazit, reformave sektoriale dhe forcimit të institucioneve.

Programi do të zbatohet gjatë dhjetë vjetëve përmes një qasjeje shumëfazore programore. Pritet që nismës t’i bashkohen edhe partnerë të tjerë zhvillimorë dhe sektori privat, duke zgjeruar ndikimin dhe qëndrueshmërinë financiare të saj.

Fokusi i programit është heqja e bllokimeve në transmetimin e gazit, përmirësimi i infrastrukturës së magazinimit nëntokësor të gazit, forcimi i mekanizmave të qeverisjes dhe përmirësimi i kornizave rregullatore dhe planifikuese — në përputhje me planin e zhvillimit energjetik të Serbisë dhe objektivat e anëtarësimit të ardhshëm në Bashkimin Evropian.

Shefja e zyrës së Bankës Botërore në Serbi, Ajsha Vilijams, theksoi rolin e gazit natyror në periudhën e tranzicionit energjetik. “Gazi natyror luan një rol të rëndësishëm në periudhën e tranzicionit, gjatë së cilës Serbia do të ulë varësinë nga qymyri dhe derivatet e naftës dhe do të rrisë përdorimin e burimeve alternative, përfshirë ato të ripërtëritshmet”, tha ajo, duke shtuar: “Përfitimin më të madh nga ky program do ta kenë kryesisht ekonomitë familjare, bizneset, konsumatorët industrialë dhe ngrohësit në të gjithë vendin. Siguria më e madhe energjetike do të kontribuojë në rritjen ekonomike, zhvillimin e sektorit privat dhe krijimin e vendeve të punës.”

Për fazën e parë të programit do të ndahen 170 milionë euro (kundërvlera e 195,5 milionë dollarëve), duke filluar nga gazsjellësi magistral Trupale–Pojate dhe duke nxitur ndërtimin e kapaciteteve organizative, institucionale dhe teknike të nevojshme për zbatimin e reformave.

Burimi: Danas