Berisha për vrasjen e turistit portugez: Në Sarandë shteti dhe krimi janë një

Kreu i Partisë Demokratike, Sali Berisha, ka reaguar për vrasjen e 20-vjeçarit portugez Luis Miguel Varela Mendes në Ksamil, duke e lidhur ngjarjen me situatën e sigurisë dhe kriminalitetit në zonën e Sarandës.

Në një deklaratë për mediat, Berisha e cilësoi ngjarjen “pothuajse vrasje shtetërore”, ndërsa akuzoi qeverinë se, sipas tij, ka lejuar shkrirjen e kufijve mes shtetit dhe krimit në industrinë turistike të Sarandës.

“Vrasja e 20-vjeçarit portugez, turist në Ksamil, është një akt, sipas të dhënave, pothuaj vrasje shtetërore”, deklaroi Berisha.

Berisha ngriti akuza edhe për aktivitetin kriminal që, sipas tij, lidhet me ekonominë e zonës, duke përmendur trafiqet e drogës dhe të qenieve njerëzore, si dhe aktivitetin e lokaleve të natës.

“Vrasja e 20-vjeçarit portugez, turist në Ksamil, është një akt sipas të dhënave, pothuaj vrasje shtetërore.

E them këtë në kuptimin, jo se ai u ekzekutua nga njerëz me uniformë, por në kuptimin e vërtetë se industria turistike në Sarandë është në kthetrat e krimit.

Në Sarandë, shteti dhe krimi janë një.

Ligji nuk ekziston.

Në Sarandë, dhe jo vetëm, flitet gjerësisht për një ekonomi të bazuar në trafiqe droge, njerëzore etj, e cila gëlon nga darka në mëngjes në lokalet e natës, të cilat funksionojnë gjer në agim.

Në plazhet e pushtuara, ku nuk gjendet një metër plazh publik, por të gjitha të dominuara nga të fortit që shesin shezlonget qindra euro”, tha Berisha.