Berisha: Protesta tregoi pakënaqësinë qytetare, Rama të largohet dhe të përballet me drejtësinë

Kryetari i Partisë Demokratike, Sali Berisha, ka reaguar ndaj deklaratave të kryeministrit Edi Rama në “Shënimet e Javës”, ku komentoi protestën, duke e cilësuar atë si një moment historik dhe një disfatë të rëndë politike për kreun e qeverisë.

“Edi Rama duket se protestës së gjysmë milioni shqiptarëve dhe rrethimit të ngjeshur të mëngjesit, de facto rënien e Bastijës, e ka përjetuar si një fushëbetejë të mbushur me kufoma, kafka, gjymtyrë, plëndës e zorrë njerëzish dhe kuajsh, si Vaterlonë e tij. Ky gjysmë i prishur nga protesta epike e gjysmë milionë shqiptarëve të mbledhur nga të katër anët e Shqipërisë dhe të katër anët e dheut, në fakt kërcënoi protestuesit me masakra dhe me përgjakje, me histori vrasjesh e të tjerë”, tha Berisha.

Kreu i PD-së deklaroi se kryeministri, sipas tij, ka reaguar me gjuhë kërcënuese ndaj protestuesve dhe ka përdorur narrativa që lidhen me dhunën dhe përgjakjen.

“Me këtë rast, meqenëse ka përdorur një personazh të Stendalit për narrativën e tij, do t’i përgjigjem se për Vaterlonë ka me qindra personazhe nga rreshter në Feldmareshall, romantik si Fabricio, por midis të gjithë atyre Edi Rama është si vëlla siamez vetëm me njërin prej tyre: me rreshterin Tenardie të Viktor Hygoit, i cili nuk luftonte, por vidhte të plagosurit dhe u shkulte dhëmbët e florinjtë. Një lloj si Tenardie, Edi Rama, vjedh dhe ka vjedhur këtë kohë popullin më të varfër. Ka vjedhur votën, vjedh fondet, vjedh kafshatën, vjedh librat e shkollës, vjedh ilaçet e të sëmurëve, vjedh pasuritë publike sikur të ishte një kolonizator, vjedh shpresën, rininë e shqiptarëve”, tha ai.

Berisha i bëri thirrje Edi Ramës të largohet nga detyra dhe të përballet me drejtësinë, duke theksuar se, sipas tij, “drejtësia vonon, por nuk harron”.