Besimi i konsumatorëve në SHBA bie në shtator: frika nga inflacioni rritet

Besimi i konsumatorëve amerikanë u përkeqësua në fillim të shtatorit, ndërsa rritja e çmimeve të karburanteve dhe tensionet tregtare ushqyen frikën për inflacion edhe më të lartë në 12 muajt e ardhshëm, tregoi të premten sondazhi i Universitetit të Michiganit.

Indeksi i Besimit të Konsumatorit zbriti në 47.8 pikë këtë muaj, nga 51.7 në gusht, duke humbur parashikimin e ekonomistëve të pyetur nga Reuters, të cilët prisnin 51.0 pikë. Rënia u ndie njësoj mes demokratëve dhe republikanëve, ndërsa te të pavarurit ndryshimi ishte minimal.

Drejtoresha e sondazheve, Joanne Hsu, tha se me ringritjen e çmimeve të karburanteve dhe tensionet tregtare, konsumatorët presin që xhepat e tyre të goditen edhe më fort në muajt në vijim. Pritjet për inflacionin në 12 muajt e ardhshëm u hodhën në 4.6%, nga 4.0% në gusht. Për krahasim, në shkurt — përpara se SHBA të hynte në konflikt me Iranin — ishin në 3.4%.

Edhe pritjet afatgjata për pesë vitet e ardhshme u ngjitën lehtë në 3.4%, nga 3.3% në gusht, dhe qëndrojnë mbi nivelet e vitit 2024, që lëviznin mes 2.8 dhe 3.2 për qind. Të dhënat mbërrijnë një ditë pas raportit të inflacionit të gushtit, që tregoi çmimet e konsumit me rritje vjetore prej 3.4%.

Sondazhi u publikua vetëm pak ditë para mbledhjes së Rezervës Federale, që mbahet më 15–16 shtator, ku tregjet po llogarisin gjithnjë e më shumë rritjen e normave të interesit — e para në tre vjet.

Burimi: Reuters