BOTËRORI 2026 – Jo trofe, por një rakun! Suveniri i çuditshëm i Haaland bëhet viral

– Sulmuesi Erling Haaland nuk arriti të fitojë trofe në Botërorin e Klubeve, pasi Norvegjia u eliminua në çerekfinale nga Anglia me rezultatin 2-1, në një ndeshje të shoqëruar me polemika, shkruan corriere.it.

Debati më i madh lidhej me golin e barazimit të Jude Bellingham, pasi gjatë rivënies në lojë nga portieri norvegjez topi dyshohet se preku kabllon e kamerës ajrore (spidercam) përpara se të niste aksioni i golit.

Megjithatë, Haaland vendosi të mos kthehej në shtëpi duarbosh.

Pasi kishte blerë tashmë çizme teksane, kapele kaubojsash, një xhaketë hokeji dhe një kapele të Harvardit në Dallas, sulmuesi norvegjez zgjodhi edhe një suvenir shumë të pazakontë: një rakun të balsamosur të paraqitur sikur po pinte tekila.

Ky “shok udhëtimi” mbërriti në Oslo nën krahun e futbollistit, i cili e publikoi menjëherë në rrjetet sociale me mbishkrimin: “Më ndoqi deri në shtëpi.”

Më herët, në Snapchat, ai kishte prezantuar edhe maskotën e tij të re së bashku me dy ketra të balsamosur që “pinin” birrë, duke i quajtur me humor “pleqtë”.

Suveniri i veçantë është blerë në dyqanin e famshëm Wild Bill’s Western Store në Dallas, ku në faqen zyrtare shitej për 750 dollarë.

Në Instagram, Haaland hapi edhe një sondazh për emrin e rakunit.

Mes alternativave ishin “Tex”, “Cowboy”, “Ranger” dhe “R.O.W.”, që sipas tij ka një kuptim të dyfishtë: lidhet me lëvizjen e famshme festive “Viking Row”, por edhe me shprehjen “Raccoon on Wheels” (“Rakun mbi rrota”).