BOTËRORI – Meksikë-Angli mund të luhet më shpejt për shkak të motit

KANSAS SITI, 4 korrik /ATSH-DPA/ – FIFA është në diskutime për të afruar ndeshjen e Anglisë në fazën e 1/8-ave të Kupës së Botës me Meksikën në një kohë më të hershme për shkak të rrezikut të motit.

Skuadra e Thomas Tuchel përballet me bashkorganizatorët në një ndeshje emocionuese në ”Estadio Azteca” të dielën, me fillimin e planifikuar aktualisht për në orën 18:00 pasdite sipas orës lokale (00:00 GMT të hënën).

Por, bisedimet janë duke u zhvilluar me palët e interesuara relevante për të afruar ndeshjen për shkak të kushteve të mundshme të pafavorshme të motit në Meksiko Siti, me një kohë të re prej orës 12:00 sipas orës lokale (18:00 GMT).

Lojtari i Anglisë, Morgan Rogers, tha për ndryshimin e mundshëm se “është thjesht një pengesë tjetër për t’u kapërcyer. Do të jemi gati pavarësisht kohës. Sa më herët aq më mirë. Mezi presim pavarësisht kohës”.

Sulmuesi anglez, Marcus Rashford, gjithashtu minimizoi ndikimin e një ndryshimi të mundshëm të ndeshjes.

“Mendoj se për ne është e njëjta gjë. Duhet të jetë e njëjta gjë, duhet të jemi të përqendruar, duhet të jemi gati për çdo gjë. Mendoj se është një nga pikat e forta të grupit, përfshirë të gjithë, lojtarët, stafin, ne jemi gati për çdo sfidë që na del përpara. Natyrisht, nuk është ideale, por gjithashtu nuk ka rëndësi”, shtoi ai.

Lartësia mund të jetë sfida më e madhe, me ndeshjen që zhvillohet më shumë se 2 000 metra mbi nivelin e detit./  a.jor.