Britania vendos sanksione ndaj 7 rusëve dhe 2 instituteve kërkimore: Zhvilluan armë kimike të përdorura për vrasjen e Navalny

Britania të hënën vendosi sanksione ndaj shtatë individëve dhe dy instituteve kërkimore të lidhura me programin rus të armëve kimike, duke synuar ata që thuhet se ishin të përfshirë në zhvillimin e toksinave të përdorura për të helmuar aktivistin e opozitës ruse Alexei Navalny.

Navalny u sëmur rëndë gjatë një fluturimi në Siberi në vitin 2020 dhe laboratorët perëndimorë arritën në përfundimin se ai ishte helmuar me një agjent nervor Novichok.

Kremlini ka mohuar akuzat se shteti rus e kishte vrarë Navalnyn duke përdorur toksinë nga bretkosat helmuese.

Qeveria britanike tha të hënën se disa nga personat e sanksionuar ishin të përfshirë në zhvillimin e agjentëve Novichok dhe Epibatidine, kimikatit shumë toksik që Londra thotë se u përdor kundër Navalny-t.

Ministrja e Jashtme Yvette Cooper tha se përdorimi i përsëritur i armëve kimike nga Rusia ishte një shkelje e ligjit ndërkombëtar dhe një kërcënim për sigurinë globale.

“Nga përdorimi i agjentëve nervorë Novichok në Salisbury te Epibatidina në Siberi, helmimi i Dawn Sturgess dhe Alexei Navalny, Rusia vazhdon të përdorë mjete barbare për të shkaktuar vdekje dhe vuajtje ndaj civilëve të pafajshëm, përfshirë në Ukrainë”, shtoi ajo.

Novichok është një klasë agjentësh nervorë të nivelit ushtarak të zhvilluar gjatë epokës sovjetike. U përdor në helmimin e vitit 2018 të ish-agjentit të dyfishtë rus Sergei Skripal dhe vajzës së tij Yulia në Salisbury, një sulm që çoi gjithashtu në vdekjen e një civili, Dawn Sturgess, e cila ra në kontakt me një enë të hedhur të substancës.