BRUKSEL – BE: TikTok nuk mbron mjaftueshëm fëmijët, rrezikon gjobë të rëndë

BRUKSEL, 24 korrik /ATSH-DPA/ – Komisioni Evropian ka konstatuar paraprakisht se cilësimet e llogarive të fëmijëve në TikTok nuk përmbushin standardet e Bashkimit Evropian për mbrojtjen e të miturve.

Sipas hetimit, platforma lejon që llogaritë e fëmijëve të jenë publike, duke bërë që përmbajtja e tyre të jetë e dukshme edhe për persona që nuk kanë një llogari në TikTok.

Sipas Komisionit, kjo rrit rrezikun e kontakteve të padëshiruara nga persona me qëllime keqdashëse, si dhe mundësinë që përmbajtja e të miturve të përdoret për ngacmime kibernetike.

Gjithashtu, u kritikua fakti që algoritmi i TikTok rekomandon videot e përdoruesve 16 dhe 17 vjeç tek audienca të tjera, ndërsa edhe llogaritë private mund të zbulohen lehtësisht.

Komisioni Evropian vlerëson se këto praktika bien ndesh me kërkesat e Aktit për Shërbimet Digjitale (Digital Services Act), i cili parashikon mbrojtje të shtuar për përdoruesit e mitur.

TikTok ka të drejtë të paraqesë një përgjigje me shkrim ndaj gjetjeve paraprake.

Nëse shkeljet konfirmohen përfundimisht, kompania mund të përballet me një gjobë që arrin deri në 6% të xhiros së saj globale vjetore.