BUKURESHT – Rumania shkatërron dy dronë pranë një projekti gazi në Detin e Zi

– Zhytësit e ushtrisë rumune kanë shkatërruar me shpërthim të kontrolluar dy dronë të tipit “Gerbera” që po lëviznin në zonën ekonomike ekskluzive të Rumanisë në Detin e Zi, pranë projektit të madh të gazit “Neptun Deep”, sipas Reuters.

Dronët u zbuluan nga një anije civile që punonte pranë projektit energjetik.

Ministri rumun i Mbrojtjes, Radu Miruța tha se autoritetet ukrainase konfirmuan se dronët nuk i përkisnin forcave të Ukrainës.

Origjina e tyre nuk u përcaktua.

Për shkak të rrezikut që paraqisnin për sigurinë e anijeve dhe punimeve pranë platformës, autoritetet vendosën t’i asgjësonin në mënyrë të kontrolluar.

Rumania, anëtare e NATO-s, ka përjetuar vazhdimisht shkelje të hapësirës së saj ajrore nga dronë rusë gjatë luftës në Ukrainë.

Në korrik, avionët luftarakë rumunë “F-16” rrëzuan tre dronë rusë që kishin hyrë në hapësirën ajrore të vendit gjatë tri ditëve radhazi.

Ndërkohë, Rumania, Bullgaria dhe Turqia kanë neutralizuar më shumë se 150 mina detare që kanë lëvizur në rrugët kryesore tregtare të Detit të Zi.

Projekti “Neptun Deep”, në pronësi të përbashkët të “OMV Petrom” dhe kompanisë shtetërore “Romgaz”, pritet të nisë prodhimin në vitin 2027.

Ai synon ta bëjë Rumaninë prodhuesin më të madh të gazit në Bashkimin Evropian. /Ad.Ab./ a.jor.