Bylykbashi: Heqje e parashkrimit të ndjekjes penale për veprat e korrupsionit

Deputeti i Partisë Demokratike Oerd Bylykbashi në replikë me zv/kryeministren Belinda Balluku në seancën e sotme plenare në Kuvend, kujtoi kërkesën për heqjen e parashkrimit të ndjekjes penale për veprat e korrupsionit për ministrat dhe kryeministrin.

Në fjalën e tij në Kuvend, duke folur për kontratat koncesionare, Bylykbashi tha se ministrja Balluku është prototipi i ministres për të cilën është ngritur SPAK-u.

“Kur në vitin 2016 konceptonim idenë e SPAK-ut si Prokurori e Posaçme, ministrja që foli është ekzakt prototipi i ministrit për të cilën është ngritur SPAK-u dhe bashkë me atë që ne kërkojmë, heqjen e parashkrimit të ndjekjes penale për veprat e korrupsionit për ministra, kryeministrin etj. Sigurisht një gjë ta ketë të qartë, që kjo histori do t’i shkojë gjatë nga pas dhe si prototip që është për këtë histori do të jetë ekzakt për të cilën atë ne kemi ngritur atë institucion. Sot e keni kapur, por nesër nuk ka shans. Dhe kush ka menduar që mund të sillet në këtë formë dhe me këtë lloj cinizmi në Parlament dhe të mos ketë fare asnjë lloj konsiderate si mund të masakrohen paratë e taksapaguesve me afera korruptive, një gjë e garantoj: SPAK-un do ta ketë pas qafe dhe të gjithë pjesën tjetër të drejtësisë, por në mos sot, shumë shpejt”, tha Bylykbashi.