Callum Turner flet për herë të parë për martesën me Dua Lipën

Callum Turner ka folur për herë të parë për martesën e tij me Dua Lipën, duke e cilësuar ceremoninë si “ditën më të bukur të jetës së tij”.

Aktori i “One Night Only” e bëri rrëfimin në një intervistë për Esquire, ku foli edhe për reagimin e publikut pas martesës me këngëtaren shqiptare.

“Ishte dita më e bukur e jetës sime”, tha Turner, 36 vjeç, duke shtuar se vëmendja publike ndaj martesës së tyre ka qenë “mjaft surrealiste”.

“Shkuam në park dje dhe të gjithë ata që kalonin pranë nesh thoshin: ‘Urime!’ Është diçka e çuditshme kur të ndodh diçka kaq personale dhe më pas flitet edhe publikisht për të”, tregoi ai.

Turner dhe Dua Lipa, 30 vjeçe, u martuan fillimisht në një ceremoni intime në Old Marylebone Town Hall në Londër, në muajin maj.

Më pas, çifti organizoi një festë më të madhe në Palermo të Siçilisë, ku shkëmbyen sërish betimet në prani të familjarëve dhe miqve.

Ceremonia në Itali mblodhi një sërë emrash të njohur, mes tyre Charli XCX, Mark Ronson dhe Sir Elton John, i cili performoi për të sapomartuarit këngën e tij të famshme “Your Song”.

Pas dasmës, çifti udhëtoi drejt Taorminës për muajin e mjaltit, ku qëndruan në hotelin luksoz San Domenico Palace.

Turner zbuloi gjithashtu se krijimi i një familjeje është një nga synimet e tij për dekadën e ardhshme.

“Sigurisht. Jam 36 vjeç. Do të doja të krijoja një familje dhe të rris fëmijë”, tha aktori.

Dua Lipa dhe Callum Turner u lidhën për herë të parë në mënyrë romantike në janar të vitit 2024. Këngëtarja konfirmoi fejesën e tyre në prill 2025, duke thënë se ishte “shumë e emocionuar” për martesën.