ÇEKI – Babis: Vazhdimi i luftës në Ukrainë po e çon botën drejt “portave të ferrit”

PRAGË, 17 shtator /ATSH-DPA/- Kryeministri i Çekisë, Andrej Babis ka bërë thirrje Evropës të rrisë përpjekjet, për t’i dhënë fund luftës në Ukrainë, duke paralajmëruar se situata aktuale mund të çojë në një konflikt më të gjerë.

Duke folur në një konferencë të sigurisë në Pragë, Babis tha se Evropa dhe SHBA-ja duhet të bashkëpunojnë për të ulur në tryezën e negociatave presidentin rus, Vladimir Putin dhe presidentin ukrainas, Volodymyr Zelensky.

“Rruga në të cilën po ecën bota nuk të çon drejt sigurisë. Ajo po na çon drejt “portave të ferrit” dhe drejt Luftës së Tretë Botërore”, tha ai.

Babis shprehu shqetësim se lufta, të cilën e përshkroi si një “luftë rraskapitjeje”, mund të përhapet edhe më tej.

Ai nuk tha nëse Ukraina duhet të jetë e gatshme të heqë dorë nga territoret, në kuadër të një marrëveshjeje të mundshme paqeje.

Qeveria e drejtuar nga Babis ka mbajtur një qëndrim më të kujdesshëm ndaj mbështetjes për Ukrainën krahasuar me qeverinë e mëparshme.

Ky qëndrim e ka vendosur atë në kundërshtim me presidentin çek Petr Pavel, ish-gjeneral i NATO-s dhe një nga mbështetësit kryesorë të nismës çeke, për furnizimin e Ukrainës me miliona fishekë dhe municione. /