Çfarë ndodhi mes tyre? Michael Douglas rrëfen krizën me Catherine Zeta-Jones

Michael Douglas ka folur hapur për ndarjen e shkurtër nga bashkëshortja e tij, Catherine Zeta-Jones, në vitin 2013, duke zbuluar se nuk e kishte humbur kurrë shpresën se çifti do të rikthehej bashkë.

Aktori 82-vjeçar u pyet në një intervistë për The Sunday Times se si arriti ta “fitonte sërish” Zeta-Jones, teksa po promovon kujtimet e tij të reja, One Helluva Ride.

“E gjitha ishte e ndërsjellë… E dini, kishim problemet tona, por unë e dua shumë. Dhe pas 25 vitesh…”, u shpreh Douglas.

Aktori më pas theksoi se një martesë kërkon shumë punë.

“Martesa është shumë punë, e dini”, tha ai, duke shtuar për marrëdhënien e tyre: “Jemi mirë. Jemi në një gjendje të mirë. Kaq mund të them.”

I pyetur nëse Catherine Zeta-Jones është e shqetësuar për publikimin e librit, Douglas zbuloi: “Ajo nuk e ka lexuar.”

Douglas dhe Zeta-Jones u martuan më 18 nëntor 2000 dhe kanë dy fëmijë, Dylan, 26 vjeç, dhe Carys, 23 vjeçe, të dy të angazhuar në aktrim.

Në gusht të vitit 2013, pas afro 13 vitesh martesë, u bë e ditur se çifti kishte vendosur të “merrte një pauzë”. Në atë kohë, Douglas tha për People: “Po përpiqemi t’i zgjidhim gjërat, po flasim dhe do të shohim si do të shkojë.”

Megjithatë, çifti u pajtua pak kohë më vonë. Në vitin 2015, Douglas foli për periudhën e vështirë në The Ellen DeGeneres Show, duke thënë se një marrëdhënie “nuk mund të jetë rrugë me një drejtim”.

“Jam i çmendur pas saj. Dhe po, mendoj se çdo çift ka momentet e veta të vështira”, u shpreh ai.

Douglas shtoi se fakti që të dy janë në qendër të vëmendjes bën që jeta e tyre private të ekspozohet më shumë se ajo e çifteve të tjera.

“Jemi rikthyer më të fortë se kurrë”, kishte deklaruar ai.

Ndërkohë, në nëntor të vitit të kaluar, Zeta-Jones i kushtoi Douglas një dedikim romantik në Instagram me rastin e 25-vjetorit të martesës.

Në kujtimet e tij të reja, Douglas ka rrëfyer gjithashtu për një lidhje të fshehtë me aktoren Kathleen Turner, me të cilën luajti në Romancing the Stone, gjatë kohës kur ishte i martuar me Diandra Luker. Douglas pretendon se në atë periudhë ai dhe Luker ishin të ndarë dhe se të dy kishin lidhje jashtëmartesore.

One Helluva Ride publikohet të martën.