Çfarë po ndodh me Taylor Swift? Pamjet misterioze të “Patient Zero” ndezin teoritë e fansave

p

Pak ditë pasi la fansat të kërkonin mesazhe të fshehura në ceremoninë Emmy, Spotify dhe rrjetet sociale, Taylor Swift publikoi një tjetër surprizë: një fragment nga videoklipi i këngës së saj të re, “Patient Zero”.

Swift prezantoi një klip 13-sekondësh gjatë emisionit “CBS Mornings” të enjten, më 24 shtator. Videoklipi kinematografik sjell në ekran Swift së bashku me aktorët Dakota Johnson dhe Colin Farrell, ndërsa pas kamerës qëndron Emmanuel Lubezki, fitues i çmimit Oscar dhe i njohur për punën në filmat The Revenant, Birdman dhe Gravity.

Pamjet e shkurtra duken të errëta dhe romantike, duke treguar Swift duke larë duart, dy persona që zhyten në ujë, një trëndafil të zi, dy gra pranë një varri dhe këngëtaren me lot në fytyrë.

Natyrisht, 13 sekondat mjaftuan që Swifties të nisnin menjëherë teoritë e tyre.

Pjesëmarrja e Dakota Johnson u lidh nga fansat me një prej të dhënave që Swift hodhi gjatë një skeçi në Emmy Awards, ku përmendi frazën “North or south”.

Videoklipi i plotë i “Patient Zero” do të shfaqet të dielën, më 27 shtator, gjatë MTV Video Music Awards, ndërsa kënga publikohet të premten.

Swift, 36 vjeçe, njoftoi këngën e re më 22 shtator. Një ditë më vonë, ajo konfirmoi edhe një version të zgjeruar të albumit “The Life of a Showgirl”, i cili do të publikohet më 25 shtator dhe do të përmbajë katër këngë të reja.

Versioni, i titulluar “The Life of a Showgirl: The Encore”, do të përfshijë “Patient Zero”, “Pink Clouding”, “Babylon” dhe “Cleveland!”.

Swift shpjegoi se këngët e reja u krijuan gjatë një udhëtimi në Suedi, ku ajo shkoi për të festuar suksesin e albumit me bashkëpunëtorët e saj Max Martin dhe Shellback.

“Ne thjesht donim të reflektonim dhe të përjetonim momentin për të cilin ishim kaq mirënjohës, por aty kishte një studio dhe bëmë atë që bëjmë kur ndiejmë diçka: shkruam më shumë këngë”, shkroi ajo në Instagram.